Háskólahátíð á Suðurnesjum
Þann 17. júní s.l. urðu straumhvörf í lífi Suðuresjamanna. Ekki aðeins fögnuðum við 100 ára afmæli heimastjónrar og 60 ára sjálfstæði þjóðarinnar heldur voru einnig brautskráðir í fyrsta sinn háskólakandídatar á Suðurnesjum. Sá atburður markar tímamót á svæðinu. Vert er að óska nemendunum 17 innilega til hamingju með hinn glæsta árangur. Hann er uppskera síðustu fjögurra ára í hörku vinnu við nám. Ekki er víst að allir geri sér grein fyrir hversu mikið nemendurnir hafa lagt á sig til að ná hinum eftiursótta áfanga. Þá hefur mætt mikið á fjölskyldum þeirra og vinnufélögum. Án samstarfs, velvilja og sjálfsaga væri þetta ekki hægt.Velvilji Hákskólans á Akureyri.
Námið hefur einkum farið fram hér suðurfrá sem fjarnám hjá Miðstöð símenntunar á Suðurnesjum en kennslan verið undir stjórn kennara við Háskólann á Akureyri. Vert er að þakka rektor, Þorsteini Gunnarssyni, fyrir velvildina í ferlinu öllu. Í apríl 1999 fórum við Friðjón Einarsson norður til að leita eftir samstarfi HA um háskólakennslu á Suðurnesjum. Tók rektor erindinu svo vel að hann ritaði undir viljayfirlýsingu um taka upp kennslu á öllum námsbrautum skólans. MSS gekk svo frá formlegum samningi og hefur annast utanumhald allt hér suðurfrá með einstökum sóma. Rektor sýndi svo hug sinn í verki með því að koma hingað til brautskráningar nemendanna af Suðurnesjum. Þetta var sannarlega háskólahátíð á Suðurnesjum.
FS fyrir 30 árum – nú háskóli.
Líkja má þessum atburði við stofnun Fjölbrautaskólans fyrir tæpum 30 árum. Ég hygg að fáir atburðir hafi haft jafn mikil áhrif á samfélagið allt á Suðurnesjum enda skipta nemendur frá FS orðið þúsundum. Háskólavæðing Suðurnesja markar sömu tímamót. Þau eru rökrétt framhald af þróun byggðar á Suðurnesjum. Af námi spretta nýjungar og framfarir. Háskólanámið mun skila samfélaginu miklum verðmætum í formi mannauðs þeirra einstaklinga sem skila sér inn í atvinnulífið. Þannig munu flest þeirra er nú luku námi hverfa til starfa hér á Suðurnesju, m.a. hjúkrunarfræðingarnir sem ráðnir hafa verið á HSS.
Næstu skref.
Á liðnum vetri voru hátt í 70 nemendur við fjarnám á háskólastigi hjá MSS. Nú er að halda áfram og byggja á þeim kjarna sem þegar er til staðar. Háskóli Íslands, Tækniháskólinn og Kennaraháskólinn eru einnig opnir fyrir fjarnámi. Við þurfum að efla samstarfið við alla þessa skóla þannig að háskólavæðing á Suðurnesjum verði jafn traustur þáttur í lífi okkar og FS. Við eigum líka að stefna að opnun formlegs háskóla hér suðurfrá – íþróttaakademíu, Tækniháskólann eða annað form háskólanáms og rannsókna. Það styrkir samfélagið innan frá og eflir samkeppnisstöðu þess. Þess vegna er ástæða til að óska Suðurnesjamönnum öllum til hamingju með tímamótin – og ekki síst fyrstu fyrstu nemendum sem útskrifaðir eru úr háskóla heimafyrir. Þessi tímamót náðust vegna almenns vilja allra hlutaðeigandi um að koma háskólanámi heim í hérað.
Hjálmar Árnason,
alþingismaður.
