Á slysadeild eftir slagsmál

Á sjöunda tímanum í gærmorgun voru tveir menn fluttir á Heilbrigðisstofnun Suðurnesja til aðhlynningar þar sem þeir höfðu lent í átökum á næturklúbbnum Casínó í Keflavík. Gert var að meiðslum þeirra og fóru þeir heim að því loknu.  Ekki er vitað hver átti upptökin að átökunum.

Á dagvaktinni mældi lögreglan í Keflavík þrjá ökumenn fyrir hraðakstur á Reykjanesbraut.  Sá sem hraðast fór var mældur á 123 km þar sem hámarkshraði er 90 km. Einn ökumaður var kærður fyrir stöðvunarskyldubrot.

Næturvaktin var mjög róleg og tíðindalaus hjá lögreglu. Þrumuveður gekk yfir Reykjanesskagann um kl. 02:30.