Bæjaryfirvöld vísa í kaupsamning og hafna erindi fjáreigenda í Sandgerði

Framkvæmda- og skipulagsráð Suðurnesjabæjar hafnaði erindi frá fjáreigendum í syðra beitarhólfi, sem sendu erindi til bæjaryfirvalda 4. mars sl. varðandi skerðingu á beitarlandi vegna íbúðabyggðar í Skerjahverfi í Sandgerði. Erindið fjáreigenda var tekið fyrir á fundi bæjarráðs Suðurnesjabæjar, sem vísaði því til umsagnar í framkvæmda- og skipulagsráði.

Í kaupsamningum Sandgerðisbæjar á jörðum í Bæjarskershverfi frá 1994, sem Skerjahverfi byggist á, er skýrt kveðið á um það í 2. gr. samningana að „í kaupunum fylgi öll eignarráð, gögn og gæði yfir hinu selda landi hverju nafni sem nefnast í heild eða að hluta, s.s. vatnsréttindi námuréttindi, hitaréttindi, girðingar, ræktun, veiðiréttur, malarnám og önnur réttindi, þannig að eignarréttur kaupanda er án nokkurra takmarkana.“

Með tilvísan í framangreint hafnar ráðið erindi fjáreigenda.