Engar súlur að Hafnargötu 50

Umhverfis- og skipulagsráð hefur samþykkt að veita Húsanesi ehf. byggingaleyfi til að byggja verslunar- og íbúðarhúsnæði að Hafnargötu 50 í Keflavík. Húsið má ekki skyggja á næsta hús og því skulu súlur sem fyrirhugaðar voru við húsið fjarlægðar og hönnun hússins breytt svo það sé gerlegt.Það var Halldór Ragnarsson, f.h. Húsaness ehf., sem sótti um leyfi til að byggja verslunar- og íbúðarhús skv. meðfylgjandi uppdráttum frá Einari V. Tryggvasyni dags. 21.02.03. Grenndarkynning hefur farið fram, athugasemd barst frá einum aðila sbr. bréf dags. 31.03.03.

Athugasemdir eru gerðar við m. a. að húsið standi of framarlega, súlur á 1. hæð séu utan byggingarlínu, húsið sé ekki samsíða Hafnargötu 52 og að húsið skyggi á Hafnargötu 52.

Byggingarreitur Hafnargötu 50 hefur sömu dýpt og er í sömu fjarlægð frá götu og húsið á Hafnargötu 52 og með því að það er frístandandi en ekki byggt fast að Hafnargötu 52 skyggir það síður á það hús en ella. Því er ekki fallist á að húsið standi of framarlega né skyggi á aðliggjandi hús.

Fallist er á athugasemdir varðandi súlur sem standa utan byggingareits og umsækjanda gert að breyta hönnun hússins þannig að súlurnar falli út. Þá skal byggingarlína rétt af miðað við götulínu norðanhúss. Samþykkt að veita byggingarleyfi.

Myndin: Unnið við nýbyggingu Húsaness við Þórustíg í Njarðvík.