Mete meiddur

Varnarjaxlinn Guðmundur Mete, leikmaður Keflavíkur, verður frá vegna meiðsla næstu tvær vikurnar og missir því af nágrannaslag Keflavíkur og Grindavíkur á mánudag í næstu viku.

Guðmundur meiddist í gær þegar Keflvíkingar slógu út ÍA 4-3 í 8-liða úrslitum VISA bikarkeppninnar í knattspyrnu. Guðmundur meiddist í viðbótartíma og fór í myndatöku á Borgarspítalanum þar sem kom í ljós að hann var ekki brotinn en hinsvegar illa marinn á öðrum fæti.

Að sögn sjónarvotta í stúku var tæklingin ljót, Guðmundur var að reyna að losa sig við boltann þegar Bjarni Guðjónsson kom askvaðandi í hann og eftir lá Guðmundur. Bjarni fékk gult spjald fyrir vikið.