Tap gegn Serbum

Íslenska landsliðið í körfuknattleik tapaði fyrir sterku liði Serba 91-78 í fyrsta leik sínum í undankeppni Evrópumótsins í gærkvöldi.

Í hálfleik höfðu Serbar 18 stiga forystu 47-29 en íslenska liðið bætti leik sinn í þriðja og fjórða leikhluta og tókst að saxa á forskot Serba sem þó höfðu sigur að lokum eins og áður segir.

Jón Arnór Stefánsson skoraði 21 stig fyrir íslenska liðið en Pavel Ermolinskij var með 14 stig og 5 fráköst og Hlynur Bæringsson 13 stig og 8 fráköst.