M:orðið í Norðri

Grafarþögn, glæpatónlist og rannsóknarlögreglan verða efniviður norrænu bókasafnavikunnar á Bókasafni Reykjanesbæjar í ár.  Bókasafnavikan hefst mánudaginn 13. nóvember og boðið verður til upphafshátíðar kl. 18:00 á bókasafninu. Yfirskrift þessarar 10. norrænu bókasafnaviku er M:orðið í Norðri.

Ólafía Hrönn Jónsdóttir leikkona, sem túlkar Elínborgu í Mýrinni mun lesa úr Grafarþögn Arnaldar Indriðasonar, en úr þeirri bók er texti ársins. Sigurður Guðmundsson tónlistarmaður og fyrrum Hjálmameðlimur ætlar að flytja spennuþrungna tónlist með glæpaívafi. Þá munu gestir fá innsýn í störf rannsóknarlögreglumanns í ofbeldisbrotadeild því Kristján Ingi Kristjánsson frá Rannsóknarlögreglunni í Reykjavík kemur og heldur erindi. Einnig verða til sýnis tól og tæki sem rannsóknarlögreglumenn nota við störf sín.

 Dagskráin hefst stundvíslega kl. 18:00 á Bókasafni Reykjanesbæjar og eru allir velkomnir meðan húsrúm leyfir (já og kjarkurinn).