„Og svo nýja í næstu höfn“ - á morgun

Dagskrá undir heitinu „Sjómannslíf, sjómannslíf...“ þar sem teknir eru fyrir textar í sjómannalögum, með lifandi tóndæmum, verður í Saltfisksetrinu í Grindavík miðvikudagskvöldið 9. maí kl. 20.

Sjómennskan lokkar og laðar! Í sjómannalögum fyrri tíma kemur fiskeríið, ástin, hið ljúfa líf, draumar og allt þar á milli við sögu. Menningararfur okkar Íslendinga á sér djúpar rætur í þessum lögum og þeir eru ófáir Íslendingarnir sem þekkja þau út og inn.

Textar í sjómannalögum verða til umfjöllunar í Saltfisksetri Íslands í Grindavík miðvikudagskvöldið 9. maí kl. 20. Það eru þau Ásgeir Tómasson frétta- og dagskrárgerðarmaður hjá Ríkisútvarpinu og Úlfhildur Dagsdóttir bókmenntafræðingur sem stíga á stokk og fjalla um texta í sjómannalögum. Hljómsveitin Meðbyr, sem staðið hefur fyrir söngskemmtuninni Óskalög sjómanna í Grindavík, mun sjá um að flytja tóndæmi inn á milli. Það verður því rífandi vertíðarstemmning í Saltfisksetrinu en á meðal þeirra laga sem hljómsveitin Meðbyr tekur má nefna Þórð sjóara, Einsa kalda og Suðurnesjamenn.

Fyrirlestur Ásgeirs “Fley og fagrar árar”, fjallar að mestu um sjómannatexta í íslenskum dægurlögum á árunum 1953-70, hvernig það vildi til að farið var að yrkja þá og hvað ýtti undir að sjómennska og sjómannslíf var eitt aðalyrkisefni íslenskra textahöfunda um árabil. Aðeins er tæpt á sjómannatextum fyrri alda og skoðað hvernig þróunin hefur verið síðastliðin ár.

“Og nýja í næstu höfn....” er umræðuefni Úlfhildar en hún ræðir um stöðu og ímynd kvenna í sjómannalögum.

Það er Menningar- og bókasafnsnefnd Grindavíkur og Óskalög sjómanna sem standa að kvöldskemmtun þessari. Aðgangur er ókeypis og allir velkomnir.