Skelfilegt ástand á Stapa

Ástandið á jarðvegslosunarsvæði Reykjanesbæjar á Stapanum, rétt innan við byggðina í Dalshverfi, er skelfilegt. Þar fara umhverfissóðar í skjóli myrkurs og jafnvel um hábjartan daginn og losa sig við rusl sem alls ekki má losa á þessum stað.

Meðfylgjandi ljósmyndir tók ljósmyndari Víkurfrétta á losunarsvæðinu sl. föstudag og það þarf ekki að hafa mörg orð um það sem sést á myndunum. Ástandið er skelfilegt, svo vitnað sé til íbúa sem hafði samband við blaðið og blöskraði ástandið.

Á svæðinu eru að myndast risastórir haugar og rusl og drasl fýkur um allar jarðir og yfir byggðina í Innri Njarðvík.

Í færslu á fésbókinni segir Guðlaugur Helgi Sigurjónsson hjá umhverfis- og skipulagssviði Reykjanesbæjar að hann geti staðfest að þessi sóðaskapur kostar Reykjanesbæ töluverða fjármuni á ári. Hann mun eiga fund með stjórnendum Kölku á næstunni þar sem farið verður yfir losunardaga, en hugmyndir eru komnar fram um ákveðna daga þar sem losun á úrgangi sem þessum yrði ókeypis.















VF-myndir: Hilmar Bragi Bárðarson