Langtímaveikindi kosta um 200 milljónir á árinu

Kostnaður sem hlýst af langtímaveikindum starfsfólks menntasviðs Reykjanesbæjar stefnir í að verða 200 milljónir á árinu 2024. Þetta kemur fram í gögnum Helga Arnarsonar, sviðsstjóra menntasviðs, sem lagðar voru fyrir menntaráð á dögunum.

Í ljósi kostnaðar sem áætlaður er í ár vegna langtímaveikinda starfsfólks menntasviðs Reykjanesbæjar vill menntaráð bæjarins leggja til að skoðaður verði fýsileiki þess að ráða inn starfsmann í mannauðsdeild Reykjanesbæjar sem hefur umsjón með mannauðsmálum menntasviðs.

Með þessu er mögulegt að bæta líðan starfsfólks sviðsins og þannig lækka þann kostnað sem hlýst af langtímaveikindum starfsfólks sem stefnir í 200 milljónir á árinu 2024, eins og áður segir.

Margrét Þórarinsdóttir, bæjarfulltrúi Umbótar, segist í bókun á bæjarstjórnarfundi í vikunni taka undir með Helga Arnarsyni um mikilvægi þess að ráða inn starfsmann í mannauðsdeild Reykjanesbæjar sem myndi hafa umsjón með mannauðsmálum menntasviðs.

„Það þarf að greina þann vanda sem er nú til staðar hjá starfsfólki menntasvið, hver er ástæðan á bakvið öll þessi langtímaveikindi. Eins og staðan er í dag þá erum við að tala um 200 milljónir í greiðslu til starfsfólk sem hefur farið í langtímaveikindi. Miðaða við þann kostnað sem hlýst að langtímaveikindum þá sjáum við að það endurspeglar starfsaðstæður kennara og það þarf svo sannarlega að hlúa betur að þeim,“ segir m.a. í bókun Margrétar.