Gosþyrstir skapa hættu á Reykjanesbraut

Lögreglan á Suðurnesjum hefur þurft að taka niður umferðarhraða á Reykjanesbraut milli Grindavíkurvegar og Vogavegar. Hámarkahraði þar er nú 50 km./klst.

Lögreglan segir stöðuna vera slæma en mikið er um að fólk sé að leggja bílum úti í kanti til að virða fyrir sér eldgosið og við það skapast ákveðin hætta sem lögreglan vill sporna við.

„Einnig er vert að benda á að það er gríðarlega erfitt og hættulegt að fara á fæti að gosstöðvunum þar sem hraunið þarna er mjög erfitt yfirferðar á göngu, einnig er mikið um sprungur á svæðinu og þurftum við sem dæmi að sækja göngumann þarna í nótt sem féll í sprungu og slasaðist sá eitthvað. Endilega farið varlega þarna og gætið að öryggi ykkar,“ segir í tilkynningu lögreglunnar á Suðurnesjum.