Soho café í „reynsluakstri“

Örn Garðarsson matreiðslumeistari er að opna nýtt kaffihús, Soho café, að Hrannargötu 6 í Keflavík um þessar mundir. Segja má að kaffihúsið sé í „reynsluakstri“ þessa dagana en verður svo opnað formlega síðar í mánuðinum.

Soho café býður í dag upp á súpu og samlokur í hádeginu, auk þess sem boðið er upp á smurt braut, bakkelsi, tertur o.fl.

Örn segir að Soho café eigi fyrst og fremst að vera kaffihús en virka daga verða í boði tveir heitir réttir í hádeginu en inni á staðnum eru sæti fyrir 35 manns.

Framkvæmdir við nýja kaffihúsið hafa staðið yfir undanfarna mánuði. Það stendur efst á Hrannargötunni og þaðan er gott útsýni yfir Keflavík, Bergið og út á Faxaflóa.

Opnunartímar eru enn til skoðunar og þá er verið að bíða eftir síðustu leyfum í hús, eins og t.a.m. vínveitingaleyfi. Til að byrja með verður opið frá kl. 11 að morgni og fram eftir degi virka daga. Ekki verður opið á kvöldin.

Meðfylgjandi myndir voru teknar inni á kaffihúsinu í gær. VF-myndir: Hilmar Bragi



Örn Garðarsson matreiðslumeistari á nýja kaffihúsinu sínu.



Gott útsýni er yfir Keflavík og Bergið úr stórum glugga á kaffihúsinu.



Innrétting staðarins er gróf en á sama tíma hlýleg.



Samlokur og bakkelsi ýmiskonar er í boði.