Mest virkni í syðsta gígnum og nýtt hættumatskort kynnt í dag

Mest eldvirkni er í gígnum sem er beint austur af Sýlingarfelli og er syðsti gígurinn af þeim þremur sem var virkur í gær. Hraun rennur í austur frá þeim gíg. Þetta kom fram í máli Kristínar Jónsdóttir, deildarstjóra hjá Veðurstofu Íslands, á upplýsingafundi Almannavarnadeildar ríkislögreglustjóra í dag. Einnig hefur hrauntunga runnið í vestur fyrir norðan Stóra-Skógfell frá nyrðri gíg. Lítil breyting er á hraunjaðrinum sem er lengst til suðurs.

Mikið hefur dregið úr krafti gossins en kraftur þess í dag er þó til samræmis við þau gos sem orðið hafa í Fagradalsfjalli með framleiðni upp á tíu til fimmtán rúmmetra á sekúndu. Verulega hefur dregið úr jarðskjálftavirkni. Síðasta sólarhringinn hafa áttatíu smáskjálftar orðið yfir kvikuganginum. Stærsti skjálftinn frá miðnætti er 1,2 að stærð.

Gervitunglamyndir sem teknar voru í gær sýna að hraunið sem runnið hefur frá eldgosinu sem hófst í fyrrakvöld er orðið 3,7 ferkílómetrar að stærð. Til samanburðar varð hraunið í gosinu í Geldingadölum 2021 fimm ferkílómetrar að stærð.

Ekki er gert ráð fyrir umtalsverðri gasmengun frá eldgosinu norðan Grindavíkur. Toppar hafa þó mælst á Reykjanesskaganum en vindar munu blása mengun á haf út í kvöld og á morgun en mengun getur borist yfir höfuðborgarsvæðið í dag.

Nýtt hættumatskort verður gefið út síðar í dag. Nýja hættumatið tekur gildi á morgun að öllu óbreyttu.