Stöðugt landris í Svartsengi heldur áfram

Mæligögn sýna að hraunbreiðan sem myndaðist í síðasta eldgosi var 49,3 milljón m³ og 9,0 km² að flatarmáli. Kvikusöfnun undir Svartsengi er stöðug og útlit fyrir að kvikuhlaup muni eiga sér stað innan fárra vikna en í gær, þann 18. desember, var eitt ár liðið frá því að fyrsta eldgosið í þessari atburðarrás á Sundhnúksgígaröðinni hófst. Frá því hafa orðið alls sjö eldgos sem stóðu yfir í alls 114 daga og um 216 milljón m³ af hraunbreiðum myndast.

Veðurstofa Íslands birti fyrr í dag uppfærða frétt um stöðuna á eldstöðvunum við Sundhnúksgígaröðina og nágrenni.

Heildarflatarmál nýjustu hraunbreiðunnar 9 km² og rúmmál um 49 milljón m³
Áframhaldandi kvikusöfnun undir Svartsengi
Líkur á kvikuhlaupi fara að aukast eftir nokkrar vikur ef kvikusöfnun heldur áfram á svipuðum hraða
Hættumat uppfært , gildir til 2. janúar 2025 að öllu óbreyttu
Hætta metin töluverð á Sundhnúksgígaröðinni
 

Myndmælingarteymi Náttúrufræðistofnunar og Landmælinga Íslands flugu yfir gosstöðvar þann 13. desember. Mæligögn úr fluginu sýna að hraunbreiðan sem myndaðist í síðasta eldgosi frá 20. nóvember til 9. desember var 49,3 milljón m³ og 9,0 km² að flatarmáli. Þykkasti hluti hraunbreiðunnar mældist við gíginn og varnargarða við Bláa lónið en meðalþykkt hraunbreiðunnar var 5,5 metrar.

Fréttina í heild sinni er að finna á vef Veðurstofu Íslands.