Samherji útvegar starfsfólki sínu húsnæði til bráðabirgða

Eigendur Samherja hafa brugðist við ástandinu í Grindavík með því að útvega starfsfólki sínu íbúðarhúsnæði á Ásbrú og í Reykjavík til bráðabirgða. 

„Við höfum gengið frá leigu á ellefu litlum íbúðum fyrir okkar fólk á Ásbrú í Reykjanesbæ til bráðabirgða og erum við einnig með nokkrar íbúðir að láni í Reykjavík.  Þetta eru krefjandi tímar og aðstæður fólks eru misjafnar. Það að hjálpa fólki við að finna öruggan stað fyrir sig og sínar fjölskyldur til bráðabirgða er gríðarlega mikilvægt og auðveldar öllum að horfa fram á veginn og leysa önnur krefjandi verkefni.

Við erum eftir bestu geta að verja okkar verðmæti sem eru mjög mikil í lifandi fiski og freista þess að halda uppi sem næst óskertri starfsemi við þessar aðstæður. Til þess þurfum við að hafa okkar öfluga fólk í búsetuúrræði innan okkar athafnasvæðis og er þetta liður í þeim efnum,“ segir Jón Kjartan Jónsson, framkvæmdastjóri Samherja fiskeldis.