Úrvalsdeildirnar í körfu verða Bónusdeildirnar

Körfuknattleikssamband Íslands og Bónus hafa gert samstarfssamning sín á milli og verður Bónus einn af aðalsamstarfsaðilum KKÍ. Úrvalsdeildir karla og kvenna munu nú bera nafn Bónus, Bónusdeildin, en einnig mun Bónus styðja við landsliðs- og afreksstarf KKÍ.

Markmið samstarfs KKÍ og Bónus er að gera sýnileika Bónus sem mestan í körfuknattleik á Íslandi og hvetja almenning að versla heilsusamlegar vörur. Sérstök áhersla verður á ávexti og grænmeti ásamt öðrum vörum í Bónus og þannig efla lýðheilsu landsmanna enn frekar og mun Bónus því koma með ferska sýn inn í starfsemi KKÍ og körfuboltans á Íslandi.

KKÍ þakkar Subway fyrir gott og öflugt samstarf á meðan úrvalsdeildirnar báru nafn Subway undanfarin ár.

Fyrsti leikur í Bónusdeild kvenna á næsta keppnistímabii hefst 1. október og fyrsti leikur í Bónusdeild karla 3. október.

Þetta kemur fram í fréttatilkynningu frá KKÍ