Framsóknarflokkurinn í Suðurnesjabæ fer stoltur frá borði

Nýr meirihluti D-, O- og S-lista tók til starfa á 71. fundi bæjarstjórnar Suðurnesjabæjar, fimmtudaginn 11. júlí 2024. Við í B-lista Framsóknar erum stolt af störfum okkar síðustu tveggja ára í meirihluta Suðurnesjabæjar. Við horfum ánægð yfir farinn veg á þau áherslumál sem flokkurinn kom í framkvæmd. Reynslunni ríkari höldum við áfram og hlökkum til að starfa áfram saman af heilindum fyrir fólkið í Suðurnesjabæ, nú í minnihluta.

Margar góðar ákvarðanir voru teknar á undanförnum tveimur árum, en dæmi um það eru:

Innleiðing á siðareglum kjörinna fulltrúa í Suðurnesjabæ.
Innleiðing á beinu streymi frá bæjarstjórnarfundum í Suðurnesjabæ, til að tryggja lýðræði í beinni.
Klárað framkvæmdir við nýjan leikskóla í Sandgerði sem ber heitið Grænaborg og mun taka til starfa eftir sumarleyfi.
Gjaldfrjálsar grunnskólamáltíðir barna.
Farið var af stað með frístundaakstur fyrir unga iðkendur sem þurfa að ferðast milli byggðarkjarna til að sækja íþróttaæfingar.
Tryggt var aukið fjármagn til viðhalds á leiktækjum sveitarfélagsins.
Hækkaðar voru heimagreiðslur til foreldra sem og styrkur vegna vistunar hjá dagforeldrum.
Ákvörðun tekin um miklar og mikilvægar framkvæmdir í Íþróttahúsinu í Garði.
Ákvörðun var tekin um staðsetningu á gervigrasvell í Suðurnesjabæ til að efla íþróttastarf.
Tryggðum fjármögnun frá ríkinu vegna fylgdarlausra barna. Í janúar var undirritaður samningur milli ráðuneytisins og Suðurnesjabæjar um eflingu og stuðning á barnaverndarþjónustu við fylgdarlaus börn.
Mikið var sótt á Heilbrigðisráðuneytið til þess að tryggja heilbrigðisþjónustu í heimabyggð og er það mál í góðum farvegi.
Okkar stjórnarmaður í Fisktækniskóla Íslands átti aðkomu að því að finna skólanum húsnæði í Suðurnesjabæ. Það markar stór tímamót í sveitarfélaginu þar sem þá mun í fyrsta sinn fara fram skipulögð kennsla á framhaldsskólastigi í Suðurnesjabæ.