Suðurhlíð, miðstöð fyrir þolendur ofbeldis á Suðurnesjum

Suðurhlíð, miðstöð fyrir þolendur ofbeldis á Suðurnesjum, opnaði formlega þann 17. október s.l. Þetta er fjórða þolendamiðstöðin á landinu, hinar eru Bjarkarhlíð í Reykjavík, Bjarmahlíð á Akureyri og Sigurhæðir á Selfossi.

Allar vinna þær á einn eða annan hátt út frá hugmyndafræði „Family Justice Center“ sem byrjaði að þróast í Bandaríkjunum í lok síðustu aldar. Megininntakið í hugmyndafræðinni er að veita fullorðnum þolendum ofbeldis þverfaglega þjónustu á einum stað, þeim að kostnaðarlausu og á þeirra forsendum. Það er einnig markmið Suðurhlíðar að efla fræðslu varðandi birtingarmyndir ofbeldis, algengi og afleiðingar þess.

Teymistýra Suðurhlíðar tekur á móti þolendum ofbeldis í fyrsta viðtal sem er jafnframt greiningarviðtal en þau geta orðið 1-3, það fer eftir hvers eðlis ofbeldið er og hvar þjónustunotandi er staddur í sinni vegferð. Tekið er vel á móti fólki á þeirra forsendum í öruggu umhverfi.

Heilbrigð sambönd byggjast á trausti og virðingu hvort sem þau fara fram í eigin persónu á netinu eða síma.

Ef þú finnur þig ekki örugga/n í sambandi og líður ekki vel og finnur fyrir að þú treystir ekki lengur eigin innsæi og sjálfstraust þitt hefur minnkað eða þú farin að efast um eigin dómgreind, upplifir ótta, reiði, kvíða, og finnst þú ekki hafa stjórn á eigin lífi. Gæti verið að þú búir við eða sért í samskiptum við einhvern sem beitir þig ofbeldi Einkenni þess að vera í ofbeldissambandi getur haft margar birtingarmyndir án þess að viðkomandi átti sig á að um ofbeldi sé að ræða. Gott er að vera meðvitaður um hvað er ekki í lagi í sambandi og ef að eitthvað hringir bjöllum, ætti að skoða það betur. Vegna ört vaxandi tækni í heiminum og fjölda samfélagsmiðla er auðveldara að vera í samskiptum hvar sem fólk er statt. En þau samskipti eru ekki alltaf jákvæð og auðvelt að villa á sér heimildir á bak við tölvuskjá.

Stafrænt ofbeldi felst í notkun tækja og tækni, svo sem síma, tölvu og samfélagsmiðla, til að áreita, beita ofbeldi, ofsækja, niðurlægja eða ógna. Stafrænt ofbeldi getur líka verið andlegt og kynferðislegt ofbeldi.

Nokkur einkenni stafræns ofbeldis

Maki þinn (eða fyrrverandi) er sífellt að hafa samband og athuga hvar þú ert.
Viðkomandi heimtar að fá að skoða símann þinn, vita lykilorð þín eða að þú deilir staðsetningu þinni með sér.
Viðkomandi er alltaf að birtast óvænt á stöðum þar sem þú ert.
Skilaboðin þín eða myndir hverfa.
Vinafólk þitt fær skilaboð frá þér sem þú sendir ekki.
Þú færð tilkynningu um AirTag sé virkt nálægt þér.
Merkir þig á móðgandi eða niðurlægjandi myndum.
Hótar að tala illa um þig eða bera út sögur á netinu.
Stelur eða heimtar að fá lykilorðin þín að tölvupósti, bankareikningi eða samfélagsmiðlum.
Stjórnar hver má vera vinur þinn á samfélagsmiðlum og við hverja þú mátt tala við þar.
Skráir sig inn á samfélagsmiðla í þínu nafni.
Hótar að sýna öðrum nektar- eða kynlífsmyndir af þér.
Sendir þér nektarmyndir af sér þótt þú vildir það ekki.
Notar einhverja tækni, eins og GPS, AirTags eða vefmyndavélar, til þess að fylgjast með þér.

Samkvæmt breytingu á lögum nr. 19/1940 sem samþykkt var 17. febrúar 2021 er ólöglegt að beita stafrænu kynferðisofbeldi og getur sá sem það gerir sætt sektum eða fangelsi allt að 4 árum. Það gildir einnig um þann sem hótar að dreifa myndefni, texta eða sambærilegu efni, þ.m.t. falsað efni af öðrum án hans leyfis með þeim tilgangi að vekja hræðslu eða kvíða hjá þeim sem hótunin beinist að.

Það er alltaf betra að segja einhverjum frá hvernig þér líður. Þú getur haft samband við Suðurhlíð í Reykjanesbæ sem sérhæfir sig í stuðningi við fullorðna varðandi hvers konar ofbeldi. Engu máli skiptir hversu langt er síðan ofbeldið átti sér stað. Suðurhlíð er þolendamiðstöð fyrir öll Suðurnes en hefur aðsetur að Heilsugæslunni Höfða Aðalgötu 60 Reykjanesbæ. Hægt er að panta tíma á heimasíðunni www. sudurhlid.is, noona.is og í síma 591-7085.

Ef þú ert yngri en 20 ára getur farið inn á Sjúktspjall á vegum Stígamóta sem er nafnlaust net-spjall fyrir ungmenni til að ræða áhyggjur af samböndum sínum, samskiptum eða ofbeldi.

Inga Dóra Jónsdóttir,
teymisstýra Suðurhlíðar.