Kjósum meiri árangur - Kjósum Sjálfstæðisflokkinn
Á morgun veljum við framtíðina. Við veljum ekki bara ríkisstjórn næstu fjögurra ára heldur þau gildi og stefnu sem móta samfélagið okkar. Valkostirnir eru skýrir: Vinstri stjórn með augastað á Evrópusambandinu, skattahækkunum og óvissu, eða Sjálfstæðisflokkurinn sem stendur fyrir frelsi einstaklingsins, stöðugleika og öflugt atvinnulíf. Sú stefna hefur tryggt einstök lífsgæði fyrir þjóðina.
Stefna sem skilar árangri
Undanfarin ár hefur Sjálfstæðisflokkurinn lagt grunn að öflugu samfélagi með ábyrgri efnahagsstefnu. Kaupmáttur hefur aukist, skattar lækkað og atvinnuleysi haldist lágt þrátt fyrir áskoranir. Þetta eru lífsgæði sem fólk finnur fyrir á hverjum degi.
Við höfum sýnt að það er hægt að sameina fjárhagslegt aðhald, uppbyggingu innviða og nýsköpun. Með áframhaldandi ábyrgri stjórn munum við tryggja að Ísland verði áfram í fremstu röð meðal þjóða.
Framtíðin er björt
Við viljum gera gott samfélag enn betra með því að:
- Lækka skatta og létta byrðar heimila.
- Efla atvinnulíf og skapa fleiri störf með stöðugu rekstrarumhverfi.
- Styrkja heilbrigðiskerfið með áherslu á gæði og fjölbreytt rekstrarform.
- Viðhalda stöðu Íslands sem leiðandi í grænni orku með skynsamlegri nýtingu auðlinda.
- Standa vörð um landamæri Íslands með öflugu regluverki og skilvirku eftirliti.
Vinstri stjórn eða frelsi?
Vinstri stjórn þýðir aukin ríkisumsvif, hærri skattar og skuldsetning framtíðarkynslóða. Á meðan Sjálfstæðisflokkurinn treystir á kraft fólks og fyrirtækja leita vinstri flokkarnir lausna í auknum ríkisafskiptum.
Á morgun stendur valið á milli frelsis eða afskipta, vaxtar eða stöðnunar. Sjálfstæðisflokkurinn hefur sýnt að hann getur breytt vandamálum í tækifæri og leitt þjóðina inn í bjartari framtíð.
Kæru kjósendur, kjósum áframhaldandi árangur fyrir okkur öll. Kjósum Sjálfstæðisflokkinn.
Guðrún Hafsteinsdóttir, dómsmálaráðherra og oddviti Sjálfstæðisflokksins í Suðurkjördæmi
