Engar skýrar vísbendingar um aflögun við Reykjanestá

Allt að 600 jarðskjálftar hafa verið mældir hingað til í jarðskjálftahrinu sem hófst við Reykjanestá í hádeginu í gær. Margar skjálftahrinur hafa átt sér stað á svæðinu síðan 2021 og virknin gæti haldið áfram með hléum, segir í tilkynningu frá Veðurstofu Íslands. Engar skýrar vísbendingar eru um aflögun við Reykjanestá sem myndi benda til að kvikuhreyfingar valdi jarðskjálftahrinunni.

Um kl. 14:30 í gær hófst nokkuð áköf jarðskjálftahrina nærri Reykjanestá. Mestur ákafi var í hrinunni í upphafi þegar um 50 – 60 jarðskjálftar mældust fyrstu klukkustundirnar. Þegar leið á daginn dró úr virkninni, en jókst síðan aftur skömmu fyrir miðnætti þegar jarðskjálfti af stærð 3,5 varð.

Eftir að virknin jókst aftur í gærkvöldi færðist virknin aðeins vestar.

Alls hafa mælst um 600 jarðskjálftar í hrinunni og þar af sex skjálftar yfir M3 að stærð. Tilkynningar hafa borist um að skjálftarnir hafi fundist í byggð, þ.á.m. Grindavík sem er um 12 km austan við virknina.

Hegðun hrinunnar hingað til sýnir að virknin getur dvínað og aukist svo skyndilega aftur.

Síðan 2023 hafa fimm jarðskjálftahrinur orðið á sama svæði og virknin er núna. Auk þess hafa verið töluverðar hrinur þarna á árunum 2021 og 2022 svo dæmi séu tekin. Jarðskjálftarnir eru mögulega gikkskjálftar vegna breytinga á spennusviði á Reykjanesskaganum samhliða jarðhræringum þar síðustu ár.

Aflögunarmælingar síðustu daga sýna engar skýrar breytingar sem myndi benda til að kvikuhreyfingar valdi jarðskjálftahrinunni.

Vísindafólk Veðurstofu Íslands fylgist þó áfram náið með öllum tiltækum mælingum í kringum Reykjanestá, til að meta líklegustu orsök jarðskjálftahrinunnar.