Heilsugæsla opnar í Vogum

Heilsugæsla HSS í Vogum opnaði fimmtudaginn 16. janúar í glæsilegu nýuppgerðu húsnæði að Iðndal 2. „Það er mikið fagnaðarefni að komið sé að opnun heilsugæslu og má segja að nú séum við komin hringinn ‏‏því árið 1999 hófst rekstur heilsugæslu hér í Iðndal 2 í Sveitarfélaginu Vogum,“ segir Guðrún P. Ólafsdóttir, bæjarstjóri. 

Guðlaug Rakel Guðjónsdóttir, forstjóri Heilbrigðisstofnunar Suðurnesja segir það vera merkileg tímamót hjá HSS að að opna aftur heilsugæslu í Vogum. „Þetta er liður í því að færa þjónustuna nær íbúum í Vogum en það er mikilvægt að mæta þörfum íbúa fyrir heilbrigðisþjónustu í nærumhverfi,“ sagði Guðlaug Rakel en hún og Guðrún klipptu á borða í tilefni tímamótanna. Heilsugæsluþjónusta hefur ekki verið í Vogum síðan í Covid‏.

Sveitarfélagið Vogar og HSS undirrituðu samning um leigu á aðstöðu fyrir rekstur heilsugæslu í sveitarfélaginu og hefur aðstaðan verið innréttuð í samvinnu við HSS. Aðstaðan er til fyrirmyndar, vönduð, hlýleg og rúmgóð. 

„Fyrst og síðast snýst þetta um aukna heilbrigðisþjónustu fyrir íbúa í sveitarfélaginu sem geta nú á ný sótt þjónustu í heimabyggð.  Við vonumst til að íbúar nýti vel þá þjónustu sem hér verður veitt,“ sagði bæjarstjórinn við opnunina.

Til að byrja með er boðið uppá viðtalstíma hjá lækni og í almennri hjúkrunarmóttöku, fljótlega mun opna móttaka í ung- og smábarnavernd. Í almennri hjúkrunarmóttöku felast bólusetningar, sárameðferðir, eyrnaskol, sprautumeðferðir, blóðþrýstingseftirlit og almenn  hjúkrunarráðgjöf. Einnig er boðið uppá símaráðgjöf hjá hjúkrunarfræðingi á þessum dögum. Þessi þjónusta er í boði fyrir skjólstæðinga Heilbrigðisstofnunar Suðurnesja og er sérstaklega ætluð þeim skjólstæðingum sem búsettir eru í Vogum.

Opnunartímar á heilsugæslunni í Vogum verða til að byrja með á þriðjudögum og fimmtudögum frá 9:00-12:00 og tímapantanir eru í síma 422-0500.