Kjartan Már aftur til starfa

Kjartan Már Kjartansson, bæjarstjóri, mun hefja störf að nýju þ. 1. febrúar eftir tæplega fimm mánaða veikindaleyfi. Halldóra Fríða Þorvaldsdóttir lætur af störfum á sama tíma sem starfandi bæjarstjóri.

Eins og fram hefur komið greindist Kjartan Már með krabbamein í blöðruhálskirtli í júlí sl. Hann hóf lyfjameðferð strax en í nóvember hófst geislameðferð sem lauk um miðjan desember og hann svaraði vel. Síðan þá hefur Kjartan Már verið að safna kröftum og gengið vel.

„Ég hlakka til að byrja aftur í þessu skemmtilega en krefjandi starfi. Það er margt spennandi á döfinni en líka margar áskoranir,“ segir Kjartan Már.