Grindvískur kettlingur fæddist með tréfót
– Erfðafræðileg tenging við kött úr Tyrkjaráninu?
Á ótrúlegan hátt hefur kettlingur sem nýverið fæddist á Suðurnesjum vakið athygli eftir að hafa komið í heiminn með tréfót.
Eigandi kattarins, Grindvíkingur sem vill halda nafnleynd um sinn, segir atburðinn bæði óútskýranlegan og heillandi. „Við héldum fyrst að þetta væri furðuleur fæðingargalli, en dýralæknirinn sagði að þetta væri eitthvað sem hann hefði aldrei séð áður og þegar betur var að gáð reyndist fóturinn vera úr gegnheilli eik,“ segir eigandinn.
En málið varð enn dularfyllra þegar sagnfræðingur á svæðinu benti á mögulega tengingu við sjóræningjakött sem sagður er hafa fylgt alsírskum ræningjum til Íslands í tengslum við hið illræmda Tyrkjarán árið 1627. Kötturinn gekk undir nafninu „Kapteinn Lóar“ og var með tréfót og eitt auga. Hann slapp í land en var fangaður við Járngerðarstaði. Hann hefur greinilega komið erfðaefni sínu í grindvíska læðu.
DNA-próf sýna óvenjulegan erfðamengjaþátt sem ekki hefur áður fundist hjá íslenskum húsdýrum – og líklegt er talið að tréfóturinn hafi þróast sem einhvers konar „genatjáning“ sem vísindin hafa enn ekki skilið.
„Þetta er líklega fyrsti tilfellið af líffræðilegri trévæðingu í spendýri,“ segir Dr. Elva Þöll Guðmundsdóttir, erfðafræðingur. „Við höfum séð furðuleg genastökk áður, en aldrei yfir í eik.“
Kettlingurinn kom í heiminn í janúar og er því orðinn stálpaður eins og sjá má á myndinni hér að ofan. Hann er gulbröndóttur eða rauður, eins og Grindvíkingar segja.
Íslensk erfðagreining hefur lýst yfir áhuga á að rannsaka kettlinginn nánar, en eigandinn segist ætla að leyfa honum að alast upp í friði.
