Mæla 80 til 120 skjálfta á klukkustund

Jarðskjálftavirkni á Reykjanesskaga í tengslum við kvikuhlaupið sem varð 1. apríl hefur haldist stöðug í nótt. Enn eru að mælast um 80-120 skjálftar á hverri klukkustund í kvikuganginum. Skjálftarnir dreifast nokkuð jafnt frá Stóra Skógfelli í SV hluta gangsins og norður fyrir Keili á NA hluta gangsins. Dýpi skjálftanna er áfram stöðugt á um 4-6 km dýpi að jafnaði. Þetta kemur fram í tilkynningu frá Veðurstofu Íslands.

Stærð skjálftanna frá miðnætti er undir 2 að stærð, ekki hefur mælst skjálfti yfir 3 að stærð síðan kl. 14:20 í gær, 2. apríl, en sá skjálfti var gikkskjálfti rétt NA við Eldey. Gikkskjálftum við Reykjanestá og Eldey hefur farið fækkandi og tæplega 30 skjálftar mælst frá miðnætti.

Engin virkni hefur sést á gossprungunni sem opnaðist norðan Grindavíkur þann 1. apríl en enn má greina glóð í nýja hrauninu og rýkur upp úr því á mörgum stöðum.