Samið við bankana um stuðningslán til rekstraraðila í Grindavík

Íslenska ríkið hefur gengið frá samningi við Íslandsbanka, Arion banka og Landsbankann um að annast stuðningslán til rekstraraðila í Grindavík. Samningurinn er í samræmi við lög um stuðningslán sem Alþingi samþykkti fyrir áramót. Þetta kemur fram á vef stjórnarráðsins.

Rekstraraðilar sem uppfylla skilyrði laganna geta óskað eftir stuðningsláni fyrir allt að 49 m.kr. sem er með 90% ríkisábyrgð. Stuðningslán er óverðtryggt og ber vexti sem eru jafnháir vöxtum af sjö daga bundnum innlánum lánastofnana hjá Seðlabanka Íslands hverju sinni.

Núgildandi frestur til að óska eftir stuðningsláni er til 1. júní nk. en þann 22. mars. sl. lagði fjármála- og efnahagsráðherra fram frumvarp sem felur m.a. í sér að sá frestur verði framlengdur um eitt ár eða til 1. júní 2026.