Dregur úr skjálftavirkni í kvikuganginum á Reykjanesi - gikkskjálftahrina við Trölladyngju
Jarðskjálftavirkni á Reykjanesskaga hélt áfram í nótt en hefur farið minnkandi frá fyrri dögum.
Virknin er nokkuð jafndreifð um kvikuganginn, frá Stóra Skógfelli í suðri og norður fyrir Keili. Dýpi skjálfta er ennþá nokkuð stöðugt milli 4 og 6 km.
Um kl. 17:30 í gær, 3. apríl, hófst kröftug hrina gikkskjálfta við Trölladyngju norðvestan við Kleifarvatn. Stærsti skjálftinn sem mældist var 3.9 að stærð rétt fyrir kl. 23 en alls mældust fimm skjálftar yfir 3 að stærð síðan hrinan hófst klukkan hálf sex.
Fjölmargar tilkynningar bárust Veðurstofunni um að skjálftarnir hefðu fundist í byggð. Eftir miðnætti hefur hægt og bítandi dregið úr fjölda gikkskjálfta á svæðinu.
