Eftir stendur tómur bær og óvissan er algjör

„Það ætti enginn að þurfa að ganga í gegnum þetta. Uppúr kvöldmat voru flestir farnir. Eftir að neyðarstigi var lýst yfir gengum við í hvert einasta hús eins og við höfðum lofað. Þegar ég segi við þá á ég við Lögregla, Slökkvilið Grindavíkur og allar björgunarsveitir á Suðurnesjum. Hef aldrei séð eins fumlaus vinnubrögð eins og hjá þessu fólki í kvöld. Svakalegur hópur fólks,“ skrifar Otti Rafn Simarsson, formaður Slysavarnafélagsins Landsbjargar og Grindvíkingur.

„Eftir stendur tómur bær og óvissan er algjör.

Við vorum svo síðustu Grindvíkingarnir úr bænum nú í nótt og við áttum öll í einhver hús að vernda utan Grindavíkur sem segir allt um samkennd Íslendinga á svona stundu. Aðrir tóku við vaktinni á meðan.

Takk fyrir allar kveðjurnar og öll heimboðin um land allt. Það er ómetanlegt að eiga góða að.

Ég er kominn aftur í faðm fjölskyldunnar, núna í húsi vina okkar á Selfossi þar sem það fer vel um alla og allir öruggir. Kærkomin hvíld eftir langan dag.

Þakkir til ykkar allra sem stóðuð í ströngu í kvöld hvort sem það var á fæti í Grindavík eða í öðrum tengdum verkefnum. Þetta fór eins vel og hægt var miðað við aðstæður,“ skrifar Otti í færslu á Facebook í nótt.