Glæsilegir vinningar í Jólalukku - Sambíómiðar gilda í öllum Sambíóum

Tuttugu verslanir og þjónustuaðilar á Suðurnesjum eru með í Jólalukku Víkurfrétta 2024 sem hófst í lok nóvember. Sjö þúsund vinningar verða skafðir af Jólalukkumiðum fyrir þessi jól en þeir eru frá fimmtíu fyrirtækjum. Fimmtíu bíómiðar eru meðal þessara vinninga en vinningurinn gildir í öll bíó Sambíóanna en mistök voru gerð við frágang miðans þar sem stendur að vinningurinn sé í bíóinu í Reykjanesbæ sem lokaði í nóvember.

Þá verða rúmlega fimmtíu vinningar í þremur útdráttum í desember en dregið verður úr miðum (með engum vinningi á) sem skilað er í Nettó verslanir í Njarðvík og Keflavík. Fyrsti útdráttur verður mánudaginn 9. desember og verða nöfn vinningshafa birt á vf.is og í blaði vikunnar.

Stærsti útdráttarvinningurinn er glæsilegur rafmagns hægindastóll frá Bústoð í Keflavík en tuttugu og fimm gjafabréf eru frá Nettó, frá tuttugu og fimm þúsund upp í eitthundrað þúsund krónur. Glæsilegir útdráttarvinningar eru einnig frá Byko, Húsasmiðjunni, Marriott hótelinu í Reykjanesbæ, Zolo og Co., Reykjanes Optikk, Nóa & Síríus og næst stærsti vinningurinn í Jólalukkunni er frá Hótel Keflavík, gisting á Dimond svítu ásamt kvöldverði og aðgangi að nýju SPA hótelsins.

Í auglýsingum í blaðinu má sjá upplýsingar um vinninga og fyrirtæki sem bjóða upp á Jólalukku 2024.