Fréttir

Ók í gegnum öryggisgirðingu við fundarstað varaforseta Bandaríkjanna
Bifreiðin stórskemmd innan við girðinguna. Rauða pallbílnum er lagt fyrir gatið á girðinggunni þar sem smábílnum var ekið í gegn. VF-myndir: Hilmar Bragi
Hilmar Bragi Bárðarson
Hilmar Bragi Bárðarson skrifar
mánudaginn 2. september 2019 kl. 22:45

Ók í gegnum öryggisgirðingu við fundarstað varaforseta Bandaríkjanna

Bifreið var ekið í gegnum öryggisgirðingu á Keflavíkurflugvelli í kvöld. Örskammt frá þeim stað sem bifreiðin fór í gegnum girðinguna munu Mike Pence varaforseti Bandaríkjanna og Katrín Jakobsdóttir forsætisráðherra Íslands funda eftir tæpa tvo sólarhringa.

Fjölmennt lögreglulið var sent á staðinn auk sjúkrabifreiðar. Aðstoð sjúkrabifreiðarinnar var afþökkuð þar sem ökumaður bifreiðarinnar var óslasaður. Hann var handtekinn grunaður um ölvun við akstur.

Örfáa metra frá þeim stað sem bifreiðin fór í gegnum girðinguna er hlið að aðstöðu Landhelgisgæslunnar á Keflavíkurflugvelli.

Íbúar í nágrenni við girðinguna þar sem ekið var í gegnum hana urðu varir við mikil læti þegar atvikið átti sér stað og þegar lögregla og sjúkralið komu á staðinn.

Mikill viðbúnaður er á Keflavíkurflugvelli þessa dagana vegna komu bandaríska varaforsetans. Fjöldi herflutningavéla og annarra hervéla kom til flugvallarins í dag. Þá hafa öryggissveitir frá Bandaríkjunum hreiðrað um sig á svæðinu.

Ljósmyndari Víkurfrétta tók meðfylgjandi myndir á vettvangi í kvöld.





Myndir frá vettvangi við öryggissvæðið á Keflavíkurflugvelli í kvöld. VF-myndir: Hilmar Bragi