Barna-og unglingastarf blak-deildar Keflavíkur á uppleið

Um næst síðustu helgi kepptu 18 iðkendur kvenna á bikarmóti Blaksambands Íslands sem haldið var á Akureyri. Blakdeild Keflavíkur var með fullskipað lið í U14 og U16. Að auki voru tveir keppendur með sameiginlegu liði Þróttar í U20. 

Allt voru þetta keppendur sem hófu nýlega æfingar í blaki og voru að stíga sín fyrstu skref á stórmóti, nema Eydís Steinþórsdóttir keppandi í U20 sem var að keppa í annað sinn. U14 hafnaði í 7. sæti, U16 varð í þriðja sæti í sínum riðli og U20 endaði í 6.sæti. 

Að sögn Guðrúnar Jónu Árnadóttur, þjálfara, var frammistaða og keppnisandi liðanna til fyrirmyndar og þrátt fyrir að keppendur hafi verið að stíga sín fyrstu skref gáfu þær ekkert eftir á móti þaulvönum andstæðingum. 

 Þess má geta að hópurinn fékk nýverið liðstyrk frá þrem systrum frá Venesúela sem komu til landsins sem flóttamenn og spiluðu blak í sínu heimalandi. Þá veitti Rafholt systrunum ferðastyrk sem gaf þeim tækifæri að taka þátt í mótinu, þakkar blakdeild Keflavíkur sérstaklega fyrir stuðninginn.