Vogamenn unnu Víkinga og Víðismenn skoruðu mörkin í Árbæ
Þróttur Vogum tók á móti Víkingi Ólafsvík í gær í annarri deild karla í knattspyrnu. Víkingar eru næstefsta lið deildarinnar en með sigrinum fara Þróttarar í fjórða sæti og upp fyrir Völsung á markamun. Reynismenn leika gegn Völsungi á Húsavík í dag og þurfa á stigunum að halda því þeir eru í neðsta sæti deildarinnar.
Víðismenn, sem eru í harðri baráttu um efstu sæti þriðju deildar, unnu Elliða á útivelli og eru í þriðja sæti deildarinnar.
Þróttur - Víkungur Ó. 3:2
Þróttarar fengu draumabyrjun þegar Eiður Jack Erlingsson skoraði fyrsta mark leiksins á þriðju mínútu.
Hálftíma síðar skoraði Gary John Martin (33') fyrir Víking og staðan jöfn í hálfleik.
Hreinn Ingi Örnólfsson kom Þrótti yfir öðru sinni á 74. mínútu og Jóhann Þór Arnarsson bætti við þriðja marki heimamanna fjórum mínútum síðoar (78').
Gestirnir náðu að minnka muninn á fjórðu mínútu uppbótartíma en Þróttur stóð uppi með þrjú stig.
Elliði - Víðir 1:2
![](/media/1/vidir---haukar-1-3-20240619-017.jpg)
Bessi Jóhannsson kom Víði yfir snemma í leiknum (4') og Markús Már Jónsson tvöfaldaði forystuna á 37. mínútu.
Fjórum mínútum fyrir leikslok (86') skoraði Víðismaðurinn Cameron Michael Briggs þriðja mark leiksins en í eigið mark og minnkaði muninn í eitt mark.
Það kom þó ekki að sök og Víðir vann leikinn með tveimur mörkum gegn einu.
Víðir er í þriðja sæti þriðju deildar með 28 stig, einu stigi á eftir Árbæingum.