Mars var frábær aflamánuður

Þar með er þessi fíni aflamánuður, mars, á enda og virðist sem menn séu ansi sáttir með hann. Aflinn var mjög góður, eins og kannski ekki kemur á óvart, og tíðarfarið var einstaklega hagstætt. Reyndar hófst mars með smá brælutíð og síðasti dagur mánaðarins einkenndist einnig af brælu. Þá voru nokkrir stórir togarar í vari skammt frá Keflavík. Hvernig gekk þá í mars og hversu mikill afli kom á land í höfnunum þremur?

Keflavík/Njarðvík

Í Keflavík/Njarðvík komu alls 1.032 tonn á land í 144 löndunum. Aflinn kom að mestu leyti frá netabátum og má skipta þeim í tvo meginflokka: Erling KE, sem Saltver gerir út, og bátar á vegum Hólmgríms.

Erling KE var með 430,4 tonn í 18 róðrum. Bátarnir á vegum Hólmgríms voru samanlagt með 530 tonn, þar af Friðrik Sigurðsson ÁR með mest, 253 tonn í 18 róðrum. Friðrik Sigurðsson ÁR hætti veiðum fyrir Hólmgrím þann 26. mars og fór þá til Þorlákshafnar, þar sem hann tekur þátt í netaralli. Skipstjóri hans er Sigurður Harðarson, eigandi Svölu Dís KE, sem hann fór tvo róðra eftir að Friðrik fór í Þorlákshöfn. Þar landaði hann 3,3 tonnum. Bára SH landaði í Njarðvík og var, öfugt við hina bátana, með sæbjúgu, alls 25,8 tonn í níu róðrum.

Alls lönduðu sextán bátar í Keflavík/Njarðvík í mars.

Grindavík

Þó landanir hafi verið færri í Grindavík, alls 85, þá var aflinn töluverður, enda margar stórar landanir, meðal annars frá togurum og stórum línubátum. Heildarafli nam 3.288 tonnum frá alls 18 bátum. Sighvatur GK var með 500 tonn í fjórum túrum, mest 146 tonn. Páll Jónsson GK landaði 433 tonnum í þremur róðrum, mest 156 tonn. Hulda Björnsdóttir GK, togari, landaði 440 tonnum í þremur löndunum, mest 163 tonn. Jökull ÞH, netabátur, landaði 410 tonnum í fjórum róðrum, mest 114 tonn. Athyglisvert er að skipstjóri Jökuls er Sigvaldi Hólmgrímsson, sonur Hólmgríms sem áður var nefndur í tengslum við Keflavík/Njarðvík. Allur afli Jökuls var fluttur til vinnslu á Húsavík. Bátar Einhamars ehf voru að mestu leyti með löndun í Grindavík, þó þeir færu einnig til Sandgerðis. Auður Vésteins SU var hæstur með 200 tonn í sautján róðrum, mest 20 tonn. Gísli Súrsson GK var með 136 tonn í ellefu róðrum, mest 19,8 tonn.

Sandgerði

Mjög mikið var um að vera í Sandgerði í mars, langflestir bátar og flestar landanir.

Alls lönduðu 36 bátar þar í 273 löndunum, með samanlagt 2.930 tonna afla.

Sigurfari GK, dragnótabátur, var hæstur með 307 tonn í 11 róðrum, mest 47 tonn. Ufsaveiðin hjá honum jókst töluvert undir lok mánaðarins. Pálína Þórunn GK landaði 275 tonnum í fjórum róðrum, mest 72 tonn.

Margir línubátar lönduðu í Sandgerði: Kristján HF var hæstur með 292 tonn í 23 róðrum, mest 18 tonn. Óli á Stað GK kom næstur með 264 tonn í 23 róðrum, mest 20,1 tonn. Indriði Kristins BA fylgdi fast á eftir með 245 tonn í sautján róðrum, mest 21,7 tonn.

Fjölmargir færabátar lönduðu einnig þar. Fagravík GK var hæstur með 32 tonn í fjórtán róðrum, mest 3,2 tonn. Þórdís GK var með 20 tonn í níu róðrum. Huld SH landaði 18,5 tonnum í sjö róðrum. Hún tvílandaði tvo daga í röð – með 4,1 tonn einn daginn í tveimur róðrum og 5,3 tonn daginn eftir, einnig í tveimur löndunum.

Framundan

Framundan er rólegri tíð, því hrygningarstopp hefst strax 1. apríl. Stoppið er svæðaskipt og nær frá Stokksnesi fyrir austan og alla leið vestur að Skorarvita, skammt frá Rauðasandi á sunnanverðum Vestfjörðum.

Stoppið hefst á mismunandi tímum eftir svæðum, en lýkur öllu saman 17. og 18. apríl.