Bara mói?
Ég leyfi mér að birta hér athugasemd sem ég gerði við breytingu á deili- og aðalskipulagi vegna Aðaltorgs, í von um að það hreyfi við bæjarfulltrúum og ekki síður íbúum bæjarins.
Ég mótmæli harðlega fyrirætlunum um breytingar á aðal- og deiliskipulagi fyrir Aðaltorg eins og það er sett fram. Þessi framkvæmd, þrátt fyrir yfirlýsingar um annað, mun hafa gríðarlega áhrif á dýralíf á þessu svæði, að ekki sé talað um íbúa svæðisins og þá ekki síst þá byggð sem er næst þessu svæði. Þetta er ekkert annað en aðför að íbúum efstu húsa Suður-, Elliða- og Heimavalla af hendi forsvarsmanna Aðaltorgs og Reykjanesbæjar.
Þetta svæði, hvar ætlunin er að reisa 450 íbúðir á, er varpstaður mófugla. Lóa, spói og hrossagaukur eiga sér þarna afdrep, og eflaust fleiri. Þarna er stórt varpsvæði sílamáva, sem stjórnendur Reykjanesbæjar virðast í mikilli nöp við og þrengja stöðugt að varpsvæðum hans. sbr. athugasemdir vegna fyrirhugaðar byggðar í Keflavíkurborgum. Kríur verpa þarna einnig og einstaka rjúpa sést þar vor og vetur. Af þessari ástæðu einni ætti að banna þessa framkvæmd.
Áhrif á dýralíf
Ég set mikinn fyrirvara á hvaða áhrif þessi fyrirhugaða byggð hefur á vötnin okkar, Rósaselstjarnir, enda byggð komin ansi nálægt því svæði. Svæðið í kringum Rósaselstjarnir hefur undanfarin ár verið byggt upp með skógrækt og samhliða því hefur notkun þess sem útivistarsvæði orðið vinsælla. Dýralíf hefur jafnframt aukist til muna. Fuglalíf þrífst þar allt árið. Gæsir, endur, vaðfuglar og hrafnar hafast þarna við svo eitthvað sé nefnt.
Þessi framkvæmd, verði hún leyfð, mun hafa gríðarleg neikvæði áhrif á íbúa í efstu byggðum Suðurvalla, Elliðavalla og Heimavalla, ranglega fullyrt í skipulags- og matsskýrslu að áhrifin séu bara bundin við Elliðavelli. Þessi mói er fyrir okkur íbúana ævintýralegt leiksvæði barna, þarna er m.a. hægt að fara í berjamó. Þessi mói er útivistarsvæði allra íbúa Reykjanesbæjar.
Ónæði af völdum annara íbúa mun aukast. Ónæði og mengun af bílaumferð mun aukast þar sem bílaumferð mun aukast til muna. Hljóðmengun mun aukast, umhverfismengun mun aukast. Við munum missa það næði og þann frið sem þetta svæði veitir okkur. Þessi mói er skjól okkar fyrir ónæði annarra íbúa, skjól fyrir ónæði af bílaumferð, skjól okkar fyrir umhverfismengun. Þessi mói er okkar næði og friður. Þessi mói er okkar útsýni, þó vissulega sé búið að spilla því með þessu forljóta gámaskipi og skemmum sem þarna eru komnar, en er þá ekki bara komið gott?
Þetta svæði sem um ræðir er óspillt, þrátt fyrir staðhæfingar í skipulags- og matsskýrslu um að það sé þegar búið að spilla því og það notað sem rök fyrir því að þessi framkvæmd sé réttlætanleg. Þó svo að það sé búið að setja upp tvær byggingar meðfram Aðalgötu þá er ansi langsótt að halda því fram að það sé þegar búið að spilla því svæði sem um ræðir. Svæðið frá þessum tveimur byggingum og að vatnstanki er algerlega óspillt og á að fá að vera það áfram.
Ef þetta gengur eftir munu byggingar vera komnar ansi nálægt efstu húsum sem nú standa, þar sem nú er ekki neitt, 450 íbúða byggð komin nánast ofan í lóðarmörkin hjá okkur.
Þegar við flest keyptum okkar hús þá var ekkert sem sagði til um það að það ætti að reisa þarna fleiri byggingar, raunar fullyrt að þarna mætti ekki byggja þar sem það væri innan flugverndarsvæðis. Eitthvað hefur sú skilgreininng breyst úr því að núna er verið í fullri alvöru að fara að reisa þarna byggð.
Í skipulags- og matsskýrslu sem gerð var fyrir þessa breytingu á skipulagi var því haldið fram að þessi byggð hefði óveruleg áhrif á þá byggð sem nú er fyrir sem er rakalaus þvættingur. Fyrir utan það allt sem að ofan er talið tel ég nokkuð ljóst að þetta komi til með að hafa neikvæð áhrif á verðmæti eigna okkar til lækkunar og kemur til með að gera okkur mun erfiðara fyrir að selja þessar eignir þegar þar að því kemur.
Einnig er nauðsyn að benda á, að þau hús sem þarna eru fyrir við móajaðarinn, sitja mun lægra en þær byggingar sem er verið að íhuga að reisa sem gerir það að verkum að nýja byggðin mun gnæfa yfir þau eins og tröll yfir maurabúi sem er ekki beint gæfuleg framtíðarsýn. Útsýni íbúa nýju byggðarinnar, sér í lagi þeirra íbúa sem eru í hæstu byggingunum, mun vera beint yfir á sólpalla húsa sem fyrir eru, með þeim óþægindum og innrás í þá friðhelgi sem fólk á heimtingu á að hafa á sinni lóð. Vegna þess hve mikið hærra þessi nýja byggð mun standa þá munum við missa sólarstundir á ákveðnum tímum árs, þegar sólin er lágt á lofti. Hugsanlegt einnig að sólsetrið, vel sýnilegt okkur núna, muni hverfa okkur úr augnsýn.
Fullyrðingar í skipulags- og matsskýrslu um að þessi nýja byggð muni veita núverandi byggð skjól, er jafnvel beinlínis röng. Háar byggingar mynda vindstrengi og það mætti því færa rök fyrir því að þessi framkvæmd komi til með að hafa neikvæð áhrif á vind til aukningar á þá byggð sem fyrir er.
Svo er það flugumferðin. Þessi fyrirhugaða byggð er í mikilli nálægð við lendingar- og flugtaks leiðir flugvéla með þeim hávaða og ónæði sem því fylgir. Það mun því enginn heilvita maður vilja búa þarna ótilneyddur, enda segir sagan að þetta sé fyrst og fremst hugsað sem viðverustaður farandverkamanna sem starfa á Keflavíkurflugvelli. Þarna eiga einnig að vera byggingar fyrir aldraða en ég get ekki ímyndað mér að það fari vel um þá í þessu ónæði af flugvélum.
Blekkingar
Eins og ég hef rakið hér að ofan mun þessi fyrirhugaða byggð svipta okkur miklum lífsgæðum samhliða því að lækka verðmæti eigna okkar. Söngur mófuglanna, friðurinn og róin, útsýnið, kvöldsólin og sólarlagið, náttúran, móinn mun minnka til muna eða jafnvel hverfa okkur með öllu.
Skipulags- og matsskýrsla framkvæmdaaðila er uppfull af blekkingum og röngum fullyrðingum og þ.a.l. ætti með öllu að hafna þessum áformum.
Framkvæmdaaðilar sigla hér undir fölsku flaggi þéttingu byggðar, yfirlýstri stefnu Reykjanesbæjar. Þétting byggðar er ágætis markmið í sjálfu sér en algert skilyrði að það sé rétt og faglega að því staðið. Þétting byggðar þarf að taka tillit til þeirrar byggðar sem fyrir er og vera unnin í nánu samráði við íbúa svæðisins sem verður fyrir áhrifum af nýrri byggð en því miður hefur hvorugt átt við í þessu máli sem er sveitarfélaginu til skammar. Það er keyrt áfram af framkvæmdastjóra Aðaltorgs með fulltingi umhverfis- og skipulagsráðs og stjórnsýslu Reykjanesbæjar.
Íbúum hefur í engu verið kynnt þetta mál, fyrir einstaka tilviljun að það kom frétt um þetta á vf.is sem og drottningarviðtal við sjálfan jarlinn af Aðaltorgi á visir.is þar sem hann útlistaði fyrirætlanir sínar, þetta væri jú bara ómerkilegur mói sem mætti missa sín. Engir kynningarfundir um þetta mál með íbúum, hvorki af hendi framkvæmdaraðila né sveitarfélagins, ekkert samráð, ekki neitt. Hér er málið keyrt áfram með gróðasjónarmið á lofti og í engu skeytt um hagsmuni íbúa.
Við þéttingu byggðar af þessari stærðargráðu hlýtur að verða að taka tillit til þeirrar byggðar sem fyrir er, sem er öll lágreist einbýlishús á einni hæð. Að detta það í hug að reisa þarna háhýsi upp á fjórar hæðir, fjórtán til átján metra há hús, ofan á þann hæðarmismun sem þarna er, er gjörsamlega galið. Þetta skipulag sem þarna á að samþykkja er í svo miklu ósamræmi við núverandi byggð að leitun er að öðru eins, kannski ónefnd viðbygging á Íshússtíg komist í hálfkvisti við þessa vitleysu. Ef mönnum er svo mikið í mun að byggja á þessu svæði þá hreinlega verður sú byggð að vera lágreist einnar hæðar byggingar.
Í óþökk íbúa
Byggðin sem þarna á að koma er heldur ekki neitt smáræði, 450 íbúðir. Gefum okkur að það verði tveir í hverri íbúð, sem er varlega áætlað, þá erum við að tala um 900 manns sem koma til með að búa á þessu svæði, og verða örugglega fleiri. Í gildandi lögum skal leitast við að lágmarksfjöldi sveitarfélags sé ekki undir 1.000 manns, þannig að það er ætlunin að setja þarna mannfjölda sem nemur heilu sveitarfélagi. Þetta yrði meiri fjöldi en er í 29 sveitarfélögum á Íslandi, 29, og hvorki er gert ráð fyrir leik- né grunnskóla í þessum tillögum, sem gefur til kynna að það sé ekki gert ráð fyrir því að barnafjölskyldur komi til með að búa þarna, það er klárlega ekki markhópurinn hvernig svo sem á því stendur. Þessi staðreynd ýtir heldur betur undir þær sögusagnir um hverjir eigi að koma til með að búa þarna. Er þá virkilega ætlunin að fórna þessu svæði og rýra verðmæti húsa þeirra sem þarna búa núna, í algerri óþökk íbúa, fyrir íbúðir farandverkamanna sem vinna á Keflavíkurflugvelli?
Þetta er ekkert annað en aðför að núverandi íbúum, aðför keyrð áfram af Aðaltorgi ehf, bökkuð upp af fulltrúum Umhverfis- og skipulagsráðs sem og stjórnsýslu sveitarfélagsins og kjörnum fulltrúum, sem ég hefði haldið að ættu að gæta hagsmuna íbúa gegn yfirgangi sem þessum. Enn og aftur fá peningaöflin að ráða.
Enginn kjörinn fulltrúi hefur gert neinar athugasemdir við þessa framkvæmd en nú þegar bæjarfulltrúi Umbótar, Margrét Þórarinsdóttir, hefur tekið að sér að berjast fyrir grænum svæðum í Dalshverfi þá hlýtur hún að berjast fyrir þessu svæði líka þó það sé aðeins brúnleitara.
Brynjar Huldu Harðarson,
íbúi Reykjanesbæjar og við móa.
