Björn hafði betur í hörku sóknarleik

Tipparar síðustu helgar, Björn Vilhelmsson og Ólafur Þór Ólafsson, buðu áhorfendum heldur betur upp á skemmtilegan sóknarleik í sinni viðureign þar sem mikið var skorað. Björn byrjaði betur enda spreðaði hann sínum þrítryggingum á fyrstu tvo leikina, Ólafi óx hins vegar ásmegin og mátti minnstu muna að hann hefði jafnað en leikar enduðu 10-9 fyrir Björn sem heldur þar með áfram. Gítarleikaranum knáa úr Sandgerði er hér með þakkað fyrir drengilega keppni og vaska framgöngu. Næsti áskorandi er Keflvíkingurinn, körfuboltaþjálfarinn og sjónvarpsstjarnan, Jón Halldór Eðvaldsson.

Jonni vill meina að hann sé dyggur stuðningsmaður Liverpool en þar sem hann á ársmiða á Old Trafford, heimavöll Manchester United, mætti halda að hann sigli jafnvel undir fölsku flaggi.

„Já nei, það þarf enginn að efast um ást mína á Liverpool, þó svo að ég eigi ársmiða hjá Manchester United. Ég fjárfesti í þeim miða fyrir Marínu konuna mína á sínum tíma og er allt útlit fyrir að um afskaplega lélega fjárfestingu hafi verið að ræða. Ég efast um að ég myndi geta selt þennan miða í dag, þótt ég glaður vildi. Annað eins hrun hjá félagi hef ég bara held ég aldrei orðið vitni að, eyðimerkurganga okkar Pool-aranna var sem göngutúr í garðinum með fullt af ísköldum á kantinum, við hliðina á þeirri þrautargöngu sem stuðningsmenn United þurfa að ganga í gegnum þessa dagana, já eða árin. Þeir mega þakka fyrir hvað liðin fyrir neðan þá eru langt á eftir, annars væru þeir í bullandi fallbaráttu. Þó svo að ég hafi trú á þessum nýja stjóra þeirra, þá efast ég um að stjórnendum beri gæfa til að sýna honum nægilega þolinmæði. Það væri kannski ráð fyrir mig núna að reyna messa Liverpool-boðskapinn yfir Marínu minni.

Ég hef ekki mikið verið að tippa en hlakka til að mæta Garðbúanum, hann hefur fengið gott start í leiknum en ég sem keppnismaður ætla að sjálfsögðu að velta honum af stalli. Ég hitti einmitt síðasta sigurvegara tippleiks Víkurfrétta á Wembley og þó svo að hvorki Liverpool né United verði á Wembley í vor, sé ég fyrir mér skemmtilega ferð til London með blaðamanni Víkurfrétta,“ sagði Jonni.

Sóknarbolti varnarmannsins

Björn var ekki beint þekktur fyrir sóknartilburði á knattspyrnuvellinum, hann var harður í horn að taka á varnarhelmingi vallarins.

„Ég ákvað að leggja áherslu á sóknarleik á síðasta seðli. Ég veit ekki hvort það hafi gerst áður að tippari spreði þrítryggingnum strax á fyrstu tvo leikina en leikaðferðin gekk alla vega upp. Hvort ég beiti sömu taktík á seðli helgarinnar verður að sjálfsögðu ekki gefið upp hér og nú, hver veit nema ég dragi eitthvað nýtt upp úr hattinum,“ sagði hinn sóknarsinnaði Björn.

                                                 Björn Vilhelmsson          Jón Halldór Eðvaldsson

Bournemouth - Brentford                    1                                     1x

Man City - Brighton                            1                                     1

Everton - West Ham                          1X2                                   12

Ipswich - Nott. Forest                         2                                      2

Southampton - Wolves                       2                                       2

Blackburn - Cardiff                             1                                      1

Coventry - Sunderland                      1X2                                   1X2

Luton - Middlesbrough                       12                                      2

Oxford Utd - Watford                         12                                     12

Plymouth - Derby                              12                                    1X2

Preston - Portsmouth                         1                                       2

Swansea - Burnley                             2                                       2

WBA - Hull                                        1                                       1