Leikar æsast í tippleiknum
Fjögurra manna úrslitin í tippleik Vikurfrétta hefjast um helgina en eftir hatramma baráttu í vetur standa fjórir efstir og munu mætast í næstu fjórum umferðum. Síðasta umferðin er laugardaginn 10. maí, þá verður krýndur tippmeistari Víkurfrétta og mun sá hinn sami fara á úrslitaleik FA cup á Wembley rúmri viku síðar, laugardaginn 17. maí, ásamt blaðamanni Víkurfrétta.
Forystusauðnum hlakkar til að býtast við goðsagnirnar sem komust áfram.
„Þetta eru miklar og vel séðar legendur sem hér eru að fara mætast mano y mano í tippleiknum góða. Við höfum allavega þrjá af fjórum í þessum Finals hópi sem hafa spilað leiki fyrir Víði Garði. Binni málaði sig mögulega út í horn. Mér varð annars fljótlega ljóst eftir að ég lauk leik að ég myndi enda ca á meðal efstu manna og hófst því undirbúningur minn fyrir Finals má segja strax í kjölfarið. Hvíldin er tipparanum mikilvæg , andlega sem og tölfræðilega. Þannig að maður var bara nokkuð ljúfur fyrstu vikurnar en fór svo fljótlega að byrja að fýra upp í #NostraDrummsen. Fylgi hans viskulegu orku að vanda. Menn finna hér og skynja hvernig sá taktfasti er að mæta fílefldur til leiks núna þegar allt er undir. Ég ætla mér ekkert annað en sigur í þessum leik,“ sagði trommarinn knái úr Keflavík
Toppaði Sverri
Næstur til að stimpla sig inn var málarameistarinn Brynjar Hólm Sigurðsson en hann rekur SB málun ásamt Liverpool-félaga sínum, Sverri Þór Sverrissyni. Brynjar var fjórum sinnum á stóra sviðinu, sem skilaði honum 32 réttum leikjum.
„Mitt fyrsta markmið var í raun bara að toppa Sverri Þór, hann mætti í þennan leik í fyrra og lét einhvern Grindvíking rúlla sér upp. Ég þurfti því ekki mikið að reyna á mig til að toppa Sverri og fann fljótlega að ég var kominn á fína siglingu og var ánægður með að ná 32 leikjum réttum og grunaði að það myndi duga til að fleyta mér í fjögurra manna úrslitin. Ég sagði það allan tímann að ég sé fyrir mér að mæta á Anfield road í Liverpool helgina fyrir bikarúrslitaleikinn þegar mínir menn taka á móti Englandsmeistaratitlinum, og framlengi væntanlega ferðinni fram að úrslitaleiknum og hitti blaðamann Víkurfrétta í London,“ sagði kokhraustur málarameistarinn.
Hlakkar til að mæta á Wembley þótt Manchester United verði ekki að keppa
Stálmúsin Björn Vilhelmsson sem gerði garðinn frægan með liði Víðis á níunda áratugnum, var næstur til að tryggja sig í lokabaráttuna, hann var fjórum sinnum í leiknum sem skilaði honum 35 leikjum réttum. Hann er hvergi banginn fyrir komandi átök.
„Ég hef góða tilfinningu fyrir þessu. Ég finn hvernig gamla keppnisskapið er komið upp í mér og ég hlakka mikið til að glíma við minn gamla félaga úr Garðinum og Keflvíkingana. Mig hefur lengi dreymt um að mæta á Wembley og þó svo að mínir menn í Manchester United verði ekki þar að þessu sinni þá verður gaman að upplifa þennan úrslitaleik, elstu knattspyrnukeppni veraldar. Ég hlakka mikið til þessarar ferðar,“ sagði Björn.
Mun reynslan koma að góðum notum?
Annar Garðbúi og fyrrum fyrirliði Víðismanna á gullaldarárum félagsins, Guðjón Guðmundsson, var síðastur til að tryggja sig í úrslitin og þurfti bara þrjár helgar til þess. Hann byrjaði á tólf réttum, átta fylgdu svo í kjölfarið næstu tvær helgar og farseðillinn klár. Hann gerir ráð fyrir ná sér í annan farseðil - til London.
„Það er búið að vera gaman að taka þátt í þessu og vil ég þakka fyrir tækifærið. Ég hef lengi verið að tippa og tel að mín reynsla muni koma að mjög góðum notum þegar út í baráttuna verður komið. Þessir peyjar sem eru að mæta mér búa ekki yfir sömu reynslu og hún skiptir venjulega miklu máli og ég ætla að nýta hana til hins ýtrasta. Ég er strax farinn að hlakka til að heimsækja London og þennan sögufræga leikvang, Wembley,“ sagði Guðjón að lokum.
