Glæsilegt Evrópumót í Njarðvík
Massi beðinn um að halda heimsmeistaramót að ári
Massi, kraftlyftingadeild Njarðvíkur, hélt glæsilegt Evrópumót um síðustu helgi þar sem 101 keppendur tóku þátt. Með þjálfurum og öðru fylgdarliði mættu 160 manns á mótið, þeirra á meðal voru forsetar IPF [International Powerlifting Federation] og EPF [European Powerlifting Federation].
Eftir mót var lokahóf haldið á Ránni þar sem verðlaun og viðurkenningar voru veittar. Á hófinu voru Ellert Björn Ómarsson og Guðlaug Olsen frá Massa kölluð upp og þeim afhentar viðurkenningar og miklar þakkir fyrir virkilega vel skipulagt mót en umgjörð og skipulag mótsins þótti á heimsmælikvarða.
„Þau voru það ánægð með okkur að við vorum beðin um að halda heimsmeistaramót að ári. Það er mikill heiður og í raun risastórt. Til marks um það þá kemur Eurosport til landsins og streymir beint frá mótinu. Þetta er þriðja stórmótið sem við höldum en við erum búin að halda eitt Norðurlandamót og tvö Evrópumeistaramót. Heimsmeistaramót væri því skemmtileg viðbót. Við Ellert erum að hugsa málið,“ sagði Guðlaug í samtali við Víkurfréttir.
Myndasafn Jóhanns Páls Kristbjörnssonar, ljósmyndara Víkurfrétta, frá lokadegi mótsins er að finna neðst á síðunni og viðtal við Ellert Björn Ómarsson, formann Massa, verður í Suðurnesjamagasíni sem fer í loftið á föstudag.
Evrópumeistaramót í kraftlyftingum | 10. september 2023
